«Шавкаттың дәуірі бітті»: Рахмоновтың UFC-дегі болашағына күмән келтірді

ММА-блогер Сулла Хуфу қазақстандық Шавкат Рахмоновтың ұзақ үзілістен кейін UFC-ге бұрынғы деңгейде оралуына күмән келтірді. Ол тізе жарақаты, екі операция және ұзақ уақыттық белсенділіктің болмауы файтердің болашағына айтарлықтай әсер етуі мүмкін деп санайды.

Naiza подкастында сөйлеген «Наш Боец» арнасының авторы Рахмоновтың дивизионында бәсеке күшейгенін, ал оның ықтимал қарсыластары осы уақыт ішінде тұрақты түрде жаттығып, жекпе-жек өткізіп жүргенін атап өтті.

«Шавкат Рахмонов енді бұрынғыдай емес деп ойлаймын. Оның дивизионында өте мықты қарсыластар бар. Олар үздік спортшылармен жаттығып, үнемі формада жүр. Ал сен екі жылға жуық уақыт бойы жекпе-жек өткізбесең, қайта оралу өте қиын. Қайтып келген соң бірден мықтылармен жұдырықтасуға тура келеді», – деді блогер.

Сулла Хуфу бұдан бөлек, Рахмоновты қазіргі таңда чемпиондыққа басты үміткер ретінде қарастыруға болмайтынын айтты.

«Бір кезде Шавкат жекпе-жек өткізбей-ақ рейтингте төртінші орыннан бірінші орынға көтерілді. Бірақ қазір белсенді жүрген спортшыға көбірек сенген дұрыс. Меніңше, UFC-де қазір өнер көрсетіп жүрген басқа қазақстандық файтерлердің чемпион атану мүмкіндігі одан жоғары», – деді ол.

Блогер тіпті Рахмоновтың UFC-де қайта жекпе-жек өткізбеуі мүмкін деген өте қатаң болжам да айтты. Дегенмен бұл – оның жеке пікірі, ал Рахмоновтың мансабына қатысты ресми шешім жоқ.

Шавкат Рахмонов соңғы рет 2024 жылғы 7 желтоқсанда UFC 310 турнирінде Иэн Мачадо Гэрримен кездесіп, төрешілердің бірауыздан шығарған шешімімен жеңіске жеткен еді. Кейін ол тізесінен жарақат алып, екі рет операция жасатты.

Қазақстандық файтер әлі де кәсіби мансабында жеңіліп көрмеген. Оның еншісінде 19 жекпе-жек пен 19 жеңіс бар, соның 18-ін мерзімінен бұрын аяқтаған.

2026 жылғы 3 ақпанда UFC Рахмоновты ұзақ уақыттық белсенділіктің болмауына байланысты жартылай орта салмақ рейтингінен шығарды. Енді оның октагонға қашан және қандай деңгейде оралатыны басты сұраққа айналып отыр.