Шавкат Рахмоновтың бапкері көпшілікті алаңдатқан сауалға жауап берді
Эдуард Базров: Қазақстанға жекпе-жексіз қайту — біз үшін тиімсіз болмақ
Шавкат Рахмоновтың жаттықтырушысы және DAR Team командасының мүшесі Эдуард Базров Meta-ratings.kz сайтына берген сұхбатында қазақстандық жауынгердің келесі жекпе-жегіне қатысты қазіргі жағдай туралы айтты.
«Қазіргі кезде Шавкат жаттығып, жаңалықтарды күтіп жүр. Бізге жекпе-жек керек. Қазақстанға жекпе-жексіз қайту — біз үшін тиімсіз болмақ. Бізге, ең болмаса, қандай да бір қарсылас беруін күтіп отырмыз, өйткені ұзақ үзілістің болмағаны дұрыс. Октагонға шығып, жасаған жұмысымызды сезінуіміз керек.
Бізге ең болмағанда үздік ондықтағы қарсылас беруін үміттенеміз. Сол арқылы күшімізді сынап, бүгінгі күнгі деңгейімізді көруге болады. Белгілі бір титул үшін келесі жекпе-жектің қашан болатынын білмейміз, бірақ ұзақ үзілістен кейін бірден ондай жекпе-жекке шығу дұрыс емес», — деді Базров.
Еске сала кетейік, 8 желтоқсанда Шавкат Рахмонов бастапқыда жартылай орта салмақта чемпиондық белбеу үшін Белал Мұхаммедпен кездесуі керек еді. Алайда Мұхаммедтің аяғындағы инфекцияға байланысты жекпе-жектен бас тартуына тура келді.