АҚШ-қа кеткен Садулаев Ресей азаматтығынан бас тартуға қатысты соңғы шешімін айтты

Еркін күрестен Олимпиада ойындарының екі дүркін чемпионы Абдулрашид Садулаев мәлімдеме жасап, өзі үшін бұл шешімнің маңыздылығын атады.

«Менің RAF күрес лигасымен келісімшартқа қол қоюым әлемнің түкпір-түкпіріндегі жанкүйерлерді қуантып жатыр. Алайда белгілі болғандай, бұл жаңалық кейбіреулер үшін көңілсіз болып отыр. Ресей құрамасына санкциялар салынған сәттен бастап маған әртүрлі елдерден спорттық азаматтықты өзгерту жөнінде бірнеше мәрте ұсыныстар түсті және олар әлі де келіп жатыр. Алайда Ресей құрамасының капитаны ретінде мен өз еліме адалмын және халықаралық аренада, соның ішінде RAF аясында да, Ресейдің намысын қорғауды жалғастыруды жоспарлап отырмын», - деді балуан.

Сондай-ақ, ол Ресей атынан халықаралық жарыстарға қатысу үшін барын салатынын атады.

«Мен үшін әрдайым ресми ішкі және халықаралық жарыстар - Ресей, Еуропа және әлем чемпионаттары басты басымдық болып қала береді. Спорттағы кезең қысқа. Мен бұл іске жастық шағымды арнадым. Мансабымның шарықтау шегінде тұрып, басты турнирлерге қатысу мүмкіндігінен айырылған соң, күшімді мұхиттың ар жағында сынап көруге шешім қабылдадым. RAF - UFC, NHL және өзге де ұйымдар секілді жеке кәсіби лига. Әлемнің ең үздік балуандары жиналған лигада өнер көрсету маған өз әлеуетімді толық ашып, ресейлік күрес мектебінің деңгейін тағы бір мәрте дәлелдеуге мүмкіндік береді. Мен бұл шешімнің дұрыстығына сенімдімін және қазірдің өзінде еліміздің әр түкпірінен қолдау сезініп отырмын», - деп жазды балуан.

Бұған дейін Садулаевтың АҚШ-тың RAF күрес лигасында өнер көрсетуге шешім қабылдағаны айтылған еді. Ал бұл шешімге РФ күрес федерациясының президенті өкініш білдіріп, балуандардың шетел асып жатқанынан қынжылыс білдірген болатын.