Қазақстан шаңғышлары Олимпиадада 70 адам қатысқан жарыста соңғы жағында келді
Бүгін жарыс жолына барлығы 70 атлет шыққан.
Италияда өтіп жатқан XXV қысқы Олимпиадада шаңғы жарысынан алғашқы жүлде жиынтығы сарапқа салынды.
Әйелдер арасында скиатлон бағдарламасында (10 км+10 км) екі отандасымыз сынға түсті. Бүгін жарыс жолына барлығы 70 атлет шыққан. Жерлестеріміз алғашқы 50 спортшының қатарына да кірмеді. Атап айтсақ, Ксения Шалыгина мәреге 53-ші болып жетсе, Надежда Степашкина 60-сатыға жайғасты.
Бұл дисциплинада спортшылар алғашқы 10 шақырымды классикалық стильде жүріп өтеді. Ал қалған бөлікті пит-стопта шаңғы ауыстырып, еркін мәнерде бағындырады.
Бүгінгі жүлдегерлер мынадай, скиатлон:
1. Фрида Карлссон (Швеция)
2. Эбба Андерссон (Швеция)
3. Хейди Венг (Норвегия)
Енді ертең Астана уақытымен сағат 13:15-те ерлер арасында скиатлон (10 км+10 км) жарысы басталады. Айта кетейік, шаңғы жарысынан осы Олимпиадада 12 жүлде жиынтығы (ерлер 6, әйелдер 6) сарапқа салынады.
XXV қысқы Олимпиада ойындары 22 ақпанда мәресіне жетеді.