Бір салмақта бірнеше мықты: Дзюдодан ұлттық құрамада бәсеке күшейді

Қазақстандық дзюдошы Абылайхан Жұбаназар Азия ойындары алдындағы ірі халықаралық жарыста топ жарғанымен, Жапонияда өтетін құрлық додасына қатыспайды. 81 келіге дейінгі салмақта Қазақстан намысын Азия чемпионы Әділет Алмат қорғайды.

Жұбаназар тамыз айының соңында Швейцарияның Лозанна қаласында өткен «Үлкен дулыға» турнирінде алтын медаль жеңіп алды. Ол финалда Өзбекстан өкілі Арсланбек Тожиевтен басым түсті. Осы нәтижеден кейін қазақстандық спортшы әлемдік рейтингте сегізінші орынға көтерілді. 

Соған қарамастан, бапкерлер штабы Азия ойындарына Әділет Алматты апару туралы шешім қабылдаған. Ол 2026 жылы Аустриядағы Гран-при турнирін және Қытайда өткен Азия чемпионатын жеңіп алды.

81 келідегі бәсеке күшейді

Дзюдо сарапшысы Айдос Балтабайдың пікірінше, Жұбаназардың Лозаннадағы жеңісіне ұлттық құрамадағы ішкі бәсекенің күшеюі де әсер еткен.

«Бұл салмақтағы дзюдошылар Олимпиадаға немесе Азия ойындарына бару үшін құрамадағы орнын күреспен алуға тиіс», — деді сарапшы Sports24.kz басылымына берген сұхбатында.

Қазір 81 келіде Абылайхан Жұбаназар мен Әділет Алматтан бөлек, Жалғас Қайролла және ел чемпионаттарында көзге түсіп жүрген бірнеше спортшы бар. Сондықтан ірі жарыстарға қатысатын дзюдошы бұрынғы нәтижесіне ғана сүйенбей, әр турнирде өз артықшылығын дәлелдеуге мәжбүр.

Жұбаназар кейінгі жылдары халықаралық жарыстарда тұрақты нәтиже көрсетіп келеді. Ол 2023 жылғы Азия ойындарында қола жүлде жеңіп, Париж Олимпиадасына қатысты. 2026 жылы Париждегі «Үлкен дулыға» мен Азия чемпионатында қола медаль иеленді. Лозаннадағы жеңісі оның әлі де салмақ көшбасшысы болуға таласатынын көрсетті.

Ал Әділет Алмат биылғы маусымда айтарлықтай серпіліс жасады. Наурызда Аустрия Гран-приінің финалында әзербайжандық Вусал Галандарзадені жеңсе, сәуірде Азия чемпионы атанды. Осы нәтижелер бапкерлер штабының Азия ойындарына оны таңдауының басты себебі болуы мүмкін. 

Олимпиада жолдамасы үшін тартыс енді басталды

Айдос Балтабай 81 келідегі жоғары бәсеке Қазақстанға 2028 жылғы Лос-Анджелес Олимпиадасында жүлде әкелуі мүмкін деп есептейді. Сарапшының ойынша, құрамадағы орынның ешкімге алдын ала берілмеуі спортшыларды көбірек еңбектенуге және тұрақты нәтиже көрсетуге итермелейді.

Азия ойындарына бармауы Жұбаназардың Олимпиада жолынан шет қалғанын білдірмейді. Лос-Анджелес додасына дейін екі жылға жуық уақыт бар. Осы кезеңдегі әлемдік рейтинг, халықаралық жарыстарда жинаған ұпай және тікелей бәсекелестермен салыстырғандағы нәтиже шешуші болады.

Демек, Жапонияда Әділет Алмат ел намысын қорғаса, Абылайхан Жұбаназар алдағы турнирлерде құрамадағы бірінші нөмір мәртебесін қайтаруға тырысады. 81 келідегі тартыс Қазақстан дзюдосының басты мәселесі емес, керісінше, Олимпиада жүлдесіне бастайтын маңызды мүмкіндікке айналып отыр.

2026 жылғы Азия ойындары 19 қыркүйекте Жапонияның Аичи префектурасы мен Нагоя қаласында басталады.