Қазақстандық фристайлшы Италиядағы әлем чемпионатында топ жарды

Итальяның Кьеза-ин-Вальмаленко қаласында өтіп жатқан фристайл-могулдан жасөспірімдер арасындағы әлем чемпионатында 18 жастағы отандасымыз Анастасия Городко чемпион атанды.

Olympic.kz-тің мәліметінше, қазақстандық спортшы фристайл-могулдан әйелдер арасындағы бәсекеде топ жарды. Ол 71.89 ұпаймен жеңіске жеткен.

Екінші және үшінші орынды жапондық спортшылар Ито Марин (71.35) мен Юго Тагучи (69.96) өзара бөлісті.

Бұл Анастасия Городконың ауыр жарақаттан кейін қол жеткізген алғашқы жеңісі болып отыр.

2022 жылы Городко параллельді могулдан жасөспірімдер арасында әлем чемпионы атанған болатын.