Гимнастшы Нариман Құрбанов Азия чемпионатында топ жарды
Милад Карими болса еркін жаттығуда күміс медаль иеленген болатын
Ташкентте өтіп жатқан спорттық гимнастикадан Азия чемпионатында бірнеше жаттығу бойынша финал аяқталып, Қазақстан атлеті Нариман Құрбанов чемпион атанды.
Нариман ат снарядындағы жаттығуда 15.600 ұпай жинап, алтынға ие болды. Осылайша, ол екі дүркін Азия чемпионы атанып отыр. Отандасымыз былтыр Сингапурда өткен құрлық біріншілігінде де үздік шыққан еді.
Сондай-ақ, ол 2022 жылы Дохада – күміс, 2023 жылы Сингапурде қола медальге ие болды.
Аталған сында өзбекстандық Абдулла Әзімов 2-орынға тұрақтаса (14 633 балл), қола жүлде Иордания спортшысы Абу Әл-Соудға (14.633) бұйырды. Тағы бір қазақстандық спортшы Милад Карими бұл жаттығуда 13.366 ұпаймен 7-орынға жайғасты. Дегенмен, еркін жаттығуда Милад Карими күміс медальға ие болды.