Белгілі кәсіпкер Абиба Әбужақыноваға стипендия тағайындамақшы
Бұл стипендияны бұған дейін Елдос Сметов алып келген
Белгілі кәсіпкер, меценат Дулат Тастекей дзюдошы Абиба Әбужақыноваға стипендия тағайындамақшы. Бұл туралы ол өзінің Facebook-парақшасында жазған.
Айта кетейік, Париж Олимпиадасында үшінші орын үшін күресіп, жеңіліп қалған Абибаға демеуші боламын дегендер қатары артып отыр. Жарақатына қарамастан ел намысы үшін соңына дейін күрескен балуан қыздың қайсарлығына тәнті болдық дейді олар.
«Токио олимпиадасында қола жүлде алған Елдос бауырымыз сол жылы көпшіліктің шешімімен ASSYLTAS стипендиясының иегері атанған еді. Биыл бұл стипендияны Париж олимпиадасында жанкештілік көрсеткен Әбиба қарындасымыз алса, қалай қарайсыздар», - деп жазды Дулат Тастекей әлеуметтік желіде.
Кәсіпкердің бұл бастамасын жүздеген адам қолдап, Абибаның мұндай құрметке лайық екенін жазуда.
Еске салайық, бұған дейін Мәжіліс депутаты, кәсіпкер Айдарбек Қожаназаров Абиба Әбужақыноваға қомақты сыйақы беретінін мәлімдеген болатын.