Гимнаст Нариман Құрбановтың болашақ қалыңдығы неке жүзігін күтіп жүргенін айтты
Сүйіктісі - Аида Бауыржанова да өзімен бірге өнер көрсетіп жүрген гимнаст.
Париж олимпиадасында спорттық гимнастикадан күміс жүлдеге ие болған Нариман Құрбанов үйленетінін мәлімдеген. Бұл мәлімдемені оның болашақ қалыңдығы Аида Бауыржанова әлеуметтік желіден көрген.
Нариман Құрбанов өзінің сүйіктісіне үш жыл бойы уәде беріп, олимпиада аяқталған соң үйленетінін айтқан.
«Медальді сезініп үлгерген жоқпын. Елге оралып, спорттық гимнастикаға қатысы бар адамдардың қолдауын, құттықтауын көргенде барып түсінетін шығармын. Ең алдымен үйленемін. Сүйіктім әбден күтті. Аидаға үш жылдан бері Олимпиада ойындары аяқталған бойда отау құрамыз деп уәде беріп келдім. Бұйыртса, сол уәдемді орындаймын», - деді Нариман.
Ал Аида болса Instagram парақшасында «Жүзік күтемін», - деп жазып, жауап берген.
Айта кетейік, Өзбекстанның Ташкент қаласында спорт гимнастикасынан әйелдер арасында өткен Азия чемпионатында Қазақстан тұңғыш рет жүлде алды. Соңғы жарыс күнінде Аида Бауыржанова қола медальге ие болды. Ол еркін жаттығудан 13.066 ұпай жинап, үздік үштікке енді. Спортшы Филиппин мен Қытай спортшыларын ғана алға жіберді.
Аида Бауыржанова көпсайыста төртінші орын иеленіп, Париж Олимпиадасына іріктеуден өте алмады.