Қырғыз балуаны Олимпиада жүлдесін белдесу аяқталуға 20 секунд қалғанда жұлып алды
Бұл оның Олимпиада ойындарындағы екінші медалі
Қырғыздың даңқты балуаны Айсұлу Тыныбекова Париж Олимпиадасында қола жүлдеге ие болды. Шешуші сында ол аса табандылығымен жанкүйерлердің қошеметіне бөленді.
Үшінші орын үшін белдесуде Айсұлу Моңғолия спортшысымен күш сынасқан еді. Белдесудің алғашқы үш минутында моңғол спортшысы 6 ұпай еншіледі. Бұл басымдық кездесу аяқталуға 1 минут қалғанша сақталды. Дегенмен, қырғыз балуаны алдымен 2 ұпай еншілеп, соңғы 20 секундта 4 ұпайлық әдісті іске асырды.
Осылайша Қырғызстан спортшының даңқты өкілі Париж Олимпиадасының қола жүлдесіне қол жеткізді. Спортшы Париж Олимпиадасында Қырғызстан құрамасының қоржынына 5-ші жүлдені салып отыр.
Айсұлу Тыныбекова – Токио Олимпиадасының күміс жүлдегері, әлем чемпионатының 3 дүркін жеңімпазы. Азия біріншілігінің алты мәрте чемпионы. Сондай-ақ, Азия Ойындарында топ жарған.
Ол Рио Олимпиадасында 5-ші орынға тұрақтады. Сонымен бірге, Лондонда өткен ойындарға қатысқан.