Танымал спортшының отбасы жас жігітті 10 ай құлдықта ұстаған – БАҚ

23 жастағы Мұқан Неғматов әйелдер күресінен Азия чемпионатының жүлдегері Айша Уәлиханның күйеуі өзін құлдықта ұстап, түрлі қорлық көрсеткенін айтты. Жас жігіт жанайқайын STAN.KZ YouTube арнасына берген сұхбатында жеткізген.

Мұқанның сөзіне қарағанда, Әлфараби есімді жігіт пен оның Айша есімді әйелі өзін алдап шақырып, үйінде құлдықта ұстаған. Ол мұндай қорлық 10 ай 17 күнге созылғанын алға тартты. Бұл аралықта ақысын бермек түгілі, ұрып-соғып, зорлық әрекеттерін де көрсеткен. Енді жәбірленушінің анасы халық пен құқық қорғау органдарынан көмек сұрайды.

«Баламды алғаш көргенде шошып кеттім. Оның құлағы жыртылған. «Неге айтпадың?» десем, «Телефон шалғанда қасымда біреуі не пышақ, не арматура ұстап тұрады. Басқа сөз айтқызбайды» деп жауап қатты.  

Қорлық көрген жігіттің өзі Әлфарабимен танысқанына бірнеше жыл болғанын, тіпті бір кездері бірге пәтер жалдап тұрғанын айтты.

«Мен құлдықта болған жер – Солтүстік Қазақстан облысының Уәлиханов ауданына қарасты Жасқайрат ауылы. 2021 жылы аялдамада таныстық, бір аптадай бірге пәтер жалдап тұрдық. Сосын олар ауылына кетті де мен Алматыға кеттім. Бірақ телефон арқылы хабарласып тұрдық. 2023 жылы әуежайда жұмыс істеп жүргенмін. Ол мені «жұмыс бар, 500-600 мың теңге төлеймін, келемін десең, жолыңа билет алып берейін» деді. Негізі Түркияға кетуге құжат жинап жүргенмін. 28 қыркүйек күні Алматыдан Астанаға келдім. Сөйтіп әрі қарай ауылға кеттік, бірақ нақты олардың ауылына баратынымызды да білген жоқпын. Шөп шабатынымызды, менің Әлфарабиге көмектесетінімді айтқан. Бір аптадай бәрі жақсы болды, бірақ жұмысқа кірісе алмадық. Мен одан жұмысты қашан бастайтынымызды сұрадым. Бір күні досымен бірге ішіп келіп: «Южан, ежик, кете алмайсың, кететін болсаң, кетуші едің» деп тиісті», - деді жас жігіт.

Оның сөзінше, осы жайттан соң ол қашып кеткен. Бірақ айналаның бәрі су болғандықтан, алысқа кете алмапты. Көп ұзамай әлгілер артын қуып жетіп, оны ұрып-соғып, тіпті өзінің қарыз алғаны, енді оны қайтару керектігі жайлы қолхат жаздырып алған. Мұнымен қоймай, видеода да өз еркімен келгені туралы айтқызған.

Осылайша, он ай бойы ол өзін құлдықта ұстаған отбасының малын бағып, шөбін жайғастырып, басқа да ұсақ-түйек шаруасын атқарып келген. Ал оның жұмысы ұнамай қалса, қолына түскен затпен ұрады екен.

«Әкесі де айырмен, күрекпен ұрды. Қыста досы Толқын екеуі ішіп келіп, зорлық әрекеттерін көрсетті. Тіпті қолын шалбарыма салды. Үйдегілерден екі рет ақша алдыртты. Яғни менің бүйрегіме операция жасап жатыр деп хабарласты. Әйелі медбике секілді хабарласты», - дейді ол.

Қазір бұл оқиғаның мән-жайы анықталып жатыр. Ал жәбір көрген жігітке адвокат көмек қолын созған.