Қазақстандық каратэші Мөлдір Жаңбырбай Мәскеуде өткен турнирде топ жарды
Ол биыл ота жасатып, спортқа жақында ғана оралған
Мәскеуде аяқталған дәстүрлі «Moscow Universe Karate 2024» турнирінде қазақстандық Мөлдір Жаңбырбай (50 кг) жеңімпаз атанды деп хабарлайды 1bol.kz тілшісі.
Жарысқа әлемнің 31 елінен 350-ден астам спортшы қатысқан болатын. Олардың қатарында әлем және Олимпиада чемпиондары, жүлдегерлерді бар.
50 келі салмақта бақ сынаған Мөлдір Жаңбырбай жартылай финалда әзірбайжандық Фидан Теймурованы қиындықсыз жеңсе, финалда жарыс қожайыны – ресейлік Камилла Гариповадан 2:0 есебімен басым түсті.
«Қыркүйек айында денсаулығыма байланысты ота жасаттым. Қалпыма енді ғана келіп жатырмын. Бүгінгі көрсеткен өнерім өзіме ұнады деп айта алмаймын, әлі де шыңдалу қажет. Жаттығуымды жалғастырамын», - деді ол 1bol.kz тілшісіне.
Айта кетейік, Мөлдір 2023 жылы Қазақстан тарихында алғаш рет каратэден әлем чемпионы атанған. Қазіргі таңда әлемдік рейтингте ол екінші орында тұр.