Ресейден келген легионер балуан ел кубогында топ жарды
Ол ел чемпионатына әлі қатысқан жоқ
Өткен жылдың соңында Қазақстан азаматтығын алған ресейлік балуан Тараз қаласында күрес түрлерінен өтіп жатқан Қазақстан кубогында чемпион атанды.
Грек-рим күресінің балуаны Шамиль Ожаев 87 келіде барлық қарсыласын қапы қалдырып, ел ішінде жарыста алғаш рет биіктен көрінді.
Ел кубогында 87 келіге дейін салмақта күрескен Шамиль Ожаев финалда Илимдор Сатаевтан басым түсті. Айта кету керек, бұл салмақта Нұрсұлтан Тұрсынов биыл Париж Олимпиадасында белдескен болатын.
87 келіде Ресей чемпионы атанған балуан басқа ірі жарыстарда жүлде алған. Мәселен, 23 жасқа дейінгі жастар арасында Еуропа чемпионы атанып, әлем біріншілігінде қола жүлде иеленген. Сондай-ақ, әскерилер арасында әлем чемпионы.
Айта кететін жайт, Шамиль Ожаев ақпан айында ел чемпионатына қатысатын болғанымен, белгісіз себеппен белдесуге шықпай қалған еді.