Эльмира Сыздықова Оңтүстік Кореяда өткен халықаралық турнирдің чемпионы атанды
Ерлер құрамасы күміс және қола медальдарды місе тұтты
Санджу қаласында (Оңтүстік Корея) күрес түрлерінен өткен Korea Open халықаралық турнирі аяқталды. Қазақстандық спортшылар бұл жарыста алты медаль жеңіп алды, деп хабарлады Olympic.kz.
Эльмира Сыздықова жарысты алтынмен аяқтады. Ол 76 келіге дейінгі салмақ дәрежесінде үздік атанды.
Грек-рим күресінде Айбек Айтбеков (60 келі) пен Диас Сейітқалиев (77 келі) финалға дейін жеткенімен, шешуші белдесулерде жеңіліс тапты. Нәтижесінде күміс медаль иеленді.
Үшінші орынды Мақсат Сайлау, Темірлан Тұрдақын (екеуі де 87 келі салмақта), және Нұрасыл Аманәлі (97 келі) иеленді.
Айта кетейік, Эльмира Сыздықова 2021 және 2023 жылдары Азия чемпионы атанған. Сондай-ақ, 2016 жылғы жазғы Олимпиада ойындарында 69 келі салмақта қола жүлде алған.