Парижде Демеу Жадраевты жеңген жапон Нао Кусака 2024 жылдың ең үздік балуаны атанды
Олардың арасында қазақстандықтар жоқ
Күрес түрлерінен 2024 жылдың ең үздік балуандары анықталды. Олардың тізімі «Біріккен күрес әлемі» ұйымының ресми сайтында жарияланған.
Еркін күрестен жылдың ең үздік балуаны атанған — Грузияның өкілі Гено Петриашвили (125 кг).
Гено Петриашвили — Париж Олимпиадасының чемпионы, Токио Олимпиадасының күміс және Рио Олимпиадасының қола жүлдегері. Сондай-ақ, ол үш дүркін әлем чемпионы (2017, 2018, 2019 жылдары).
Грек-рим күресінен жапониялық Нао Кусака (77 кг) 2024 жылдың үздік балуаны атағына қол жеткізді. Ол Париж Олимпиадасының чемпионы, 2023 жылғы Әлем чемпионатының қола жүлдегері және 2024 жылғы Азия чемпионатының жеңімпазы. Нао Кусака Париж Олимпиадасының финалында қазақ Демеу Жадраевты жеңген болатын.
Әйелдер күресінен 68 келі салмақта күресетін түркиялық Бусе Тосун жылдың үздік балуаны атанды. Ол – Париж Олимпиадасының қола жүлдегері, 2023 жылы Белградта өткен Әлем чемпионатының жеңімпазы, 2024 жылы Еуропа чемпионы.
Айта кетейік, 2023 жылы еркін күрестен жылдың үздік балуаны атағы бахрейндік Ахмед Тажудиновке берілсе, грек-рим күресінен кубалық Луис Санческе үздік атанды. Ал әйелдер күресінен қырғызстандық Айсұлу Тыныбекованың алдына түсер ешкім болған жоқ.