АҚШ-тың ең әйгілі балуаны Алматыдағы турнирге қатысатын болды

Еркін күрестен Олимпиада ойындарының чемпионы, америкалық балуан Кайл Снайдер Алматыда өнер көрсетеді. Ол ақпан айында өтетін PWL-8 турнирінде бағын сынап көрмек.

Биыл 30 жасқа толатын танымал балуан осымен екінші рет Қазақстанға келгелі отыр. Алғаш рет Снайдер 2019 жылы Астанада өткен әлем чемпионатында 97 келіде белдесіп, қола жүлде иеленген болатын. 

Спортшы 2015 жылы әлем чемпионы атанып, 2016 жылы Риода топ жарды. Ал Токиода өткен ойындарда финалға дейін жетіп, күміс жүлде иеленді. Былтыр өткен Париждегі ойындара қола медаль үшін парсы балуанына есе жіберді.