Эльмира Сыздықова араға 8 күн салып тағы бір турнирде топ жарды
Бір апта бұрын ол Франциядан чемпион атанып келген
Ресейдің Красноярск қаласында еркін күрестен өтіп жатқан дәстүрлі Иван Ярыгин турнирінде қазақстандық балуандар 1 алтын, 1 күміс, 1 қола медальға ие болды. Әйелдер күресінен 76 келіде бақ сынаған Эльмира Сыздықова чемпион атанып, алтын жүлдеге қол жеткізді. Эльмира осылайша 8 күн ішінде екі турнирге қатысып, екеуінде де чемпион атанып отыр. Бір апта бұрын ол Францияда өткен Анри Деглан Гран Гри жарысында алтын медаль олжалаған болатын.
Сондай-ақ, әйелдер күресінен 62 келіде күрескен қазақстандық екі балуан жүлделі орыннан көрінді. Виктория Хусайнова күміс алса, Дубек Тыныс қола медаль иеленді.
Айта кетейік, Иван Ярыгин турнирі 2022 жылға дейін жыл сайын Біріккен күрес әлемінің (UWW) күнтізбесінде Гран При статусымен, кіші әлем чемпионаты деп аталатын. Украинадағы соғысқа байланысты Ресейге санкция салынғаннан бастап ол элиталық статустан айырылып, халықаралық турнир бойынша өтіп келеді.