«Көзі анық көреді»: Әзербайжандық паралимпиада чемпионының өтірігі әшкере болды
24 жастағы спортшы бұған дейін көру қабілеті шектеулі спортшылар санатына жатқызылған
Әзербайжандық дзюдошы, Токио-2020 Паралимпиадасының жеңімпазы Шахана Гаджиева параспорттық жарыстардан өмір бойына шеттетілді. Бұл шешім спортшының әлем чемпионаты алдындағы медициналық тексеріс нәтижесінде толық көру қабілетіне ие екені анықталғаннан кейін қабылданды.
24 жастағы спортшы бұған дейін көру қабілеті шектеулі спортшылар санатына жатқызылған. Алайда жаңа тексеру оның көру мүмкіндігінде ешқандай шектеу жоқ екенін көрсетті. Осыған байланысты Гаджиева енді паралимпиадалық жарыстарға қатыса алмайды.
Ұқсас жағдай тағы бір әзербайжандық спортшы Эльнара Низамлыға да қатысты тіркелді. Бұған дейін мүлде көрмейді деп саналған дзюдошы медициналық бақылау нәтижесінде жарыстарға жіберілмейтін болды.
Әзербайжанның Ұлттық паралимпиадалық комитетінің хабарлауынша, Париждегі Паралимпиада ойындарына дайындық аясында спортшыларды сыныптау жүйесіне өзгерістер енгізілген. Жаңа ережелерге сәйкес, кейбір ауру түрлері енді параспорт санатынан алынып тасталды.
Айта кетейік, Шахана Гаджиева — Паралимпиада-2020 чемпионы, Еуропа чемпионатының жеңімпазы, сондай-ақ әлем чемпионатының күміс және екі мәрте қола жүлдегері.