«Ленаны өзіміздің қыз деп санайды». Ресейлік басылым Рыбакинаның өнеріне баға берді
Елена Рыбакина 2018 жылы азаматтығын ауыстырған
Қазақстандық танымал теннисші Елена Рыбакина Уимблдонның жартылай финалында чехиялық Барбора Крейчиковадан жеңіліп, финалға шыға алмады.
«Советский спорт» басылымы бұл матч алдында былай деп пікір білдірген болатын.
«Уимблдон турнирі аяқталуға жақын. Әйелдер себетінде ресейліктер қалған жоқ, бірақ 2018 жылы азаматтығын ауыстырған, Мәскеу тумасы Елена Рыбакина бар. Ресейде Ленаны әлі күнге дейін өзіміздің қыз деп санайды, тиісінше оның ойынын бақылап отырамыз. Сондықтан жартылай финалдағы чехиялық Барбора Крейчиковамен матчы назар аударуға тұрарлық еді.
Елена әлемдік рейтингіде төртінші орында келеді, ал Барбора Уимблдонға 32-ракетка ретінде келді. Рейтингіге қарамастан, өзара кездесулерде Крейчикова ғана жеңіске жеткен: 2021 жылы – Австралияда, 2022 жылы – Чехияда. Екі ойын да үш сетте аяқталған. Алайда екі жыл бұрын Қазақстан атынан өнер көрсететін теннисші Уимблдонда топ жарған және биыл сол ертегіні қайталауды мақсат тұтады», - делінген басылымда.
Автор ойыннан соң матчқа қатысты қорытынды жасаған.
«Елена Рыбакина турнирді керемет өткізді және жартылай финалдық матчтың басын өте сәтті бастаған. Ол ойынды толықтай бақылап, сенімді түрде соққы жасап жатқан. Бірақ бір сәтте сол сенімділігінен айырылып, ойыны өзгере бастады. Тиісінше екінші және үшінші партияларда Крейчикова жинақы өнер көрсетіп, жеңіске жетті», - деп жазылған.