Қазақстан теннисшілері тарихында алғаш рет United Cup турнирінің жартылай финалына шықты
Турнирдің жүлде қоры 11 170 000 долларды құрайды
Теннистен Қазақстан құрамасы Аустралияда өтіп жатқан дәстүрлі United Cup-2025 турнирінің жартылай финалына шықты. Германиямен болған кездесуде алдымен Елена Рыбакина жеңіске жетсе, артынша Александр Шевченко неміс қарсыласынан басым түсті.
Әлемдік рейтингте 78-орында тұрған Шевченко Даниэль Мазурмен (254-орын) кездескен болатын. Матч үш сетке созылды, есеп – 6:7, 6:2, 6:2.
Айта кетейік, Александр Шевченко аталған турнирде барлығы үш ойын өткізді. Алғашқы кездесуінде испан Пабло Карреньо Бустадан (196-орын) ойсырай жеңілсе, екіншісінде грек Стефан Циципасты (11-орын) ұтып, турнир сенсациясын жасады.
Қазақстанның жартылай финалдағы қарсыласы енді анықталады. Турнирдің жүлде қоры 11 170 000 долларды құрайды.