Australian Open: қазақстандық теннисшілердің қарсыластары белгілі болды
Қазақстаннан барған алты теннисшінің үшеуі іріктеу кезеңінен өте алмай қалған
12 қаңтарда теннистен Аустралия ашық біріншілігі басталатыны анық. «Үлкен дулыға» санатындағы турнирге Қазақстаннан үш теннисші қатысады. Бүгінде олардың алғашқы айналымдағы қарсыластары анықталды.
Мәселен, әлемнің алтыншы, еліміздің бірінші ракеткасы саналатын Елена Рыбакина алғашқы ойынын аустралиялық Эмерсон Джонсқа (371-орын) қарсы өткізеді. Оны жеңген жағдайда Нурия Паррисас-Диас немесе Ива Йовичпен кортқа шығады.
Ал, Юлия Путинцева (25-орын) бірінші кездесуін армениялық Элина Аванесянға қарсы өткізеді. Олардың екеуі де Ресей тумасы. Қос теннисші 2023 жылы Пекиндегі турнирде кездесіп, ол кезде Путинцева 6:1, 6:4 оңай жеңіске жеткен болатын.
Ерлер сынында өнер көрсететін жалғыз қазақстандық Александр Бублик (33-орын) бірінші айналымда аргентиналық Франсиско Серундоломен өзара мықтыны анықтайды. Екеуі бұған дейін ресми жарыстарда кездеспеген.
Айта кету керек, Қазақстанның өзге үш теннисшісі – Михаил Кукушкин, Дмитрий Попко және Тимофей Скатов жарыстың іріктеуінен өте алмай қалды. Олардың барлығы да Ресейден алдырған легионерлер.