«Елена Рыбакина енді ешқандай турнирді жеңбейді»: жанкүйерлер теннисшге ренішін жасырмады
Ол бір жылда әлемдік рейтингте төртінші орыннан жетінші орынға дейін төмендеді
Теннистен биылғы Аустралия ашық біріншілігінде Қазақстанның бірінші ракеткасы Елена Рыбакина алысқа шаба алмады. Ол 1/8 финалда америкалық Мэдисон Кизге есе жіберді.
Бұл жеңілістен кейін Рыбакина журналистерге жеңілісінің себебін түсіндіріп, ақталғандай болған. Десе де, әлеуметтік желіде қазақстандық теннисшіні сын астына алғандар қатары көп.
Жанкүйерлердің көбі Еленаның енді қандай да бір турнирді жеңетініне сенбейді. Ал, «Үлкен дулығаны» тіпті армандаудың қажеті жоқ дейді желі қолданушылары.
«Елена Рыбакина енді ешқандай турнирді жеңбейді. Бұл бұрынғы Елена емес. Үлкен дулығаны армандамаңдар», - деген сарындағы жазбалардан аяқ алып жүре алмайсың.
Рыбакинаның жолы былтыр да болмаған. Ол онға жуық турнирді денсаулығына байланысты орта жолдан тастаса, Олимпиада ойындарына мүлдем қатысқан жоқ. Биыл жыл басынан бері екі жарысқа қатысып, екеуінде де жеңіліп қалды.
Былтыр WTA рейтингінде төртінші болған қазақстандық теннисші қазір жетінші орынға сырғыды. Егер дәл осындай нәтиже көрсетуін жалғастырса жазға дейін тағы бірнеше позицияға төмендейтіні анық.