Тимофей Скатов Грекия турнирінің ширек финалына шықты
Бұған дейін тағы бір қазақстандық теннисші Михаил Кукушкин АҚШ-та жеңіске жеткен
Қазақстан теннисшісі Тимофей Скатов Грекияның Херсониссос қаласында өтіп жатқан турнирді сәтті жалғастырып жатыр.
Отандық атлет аталған сынның 1/8 финалында жеңіске жетті. Осылайша ол жұптық сайыста ширек финалға жолдама алып отыр.
Ширек финалға шығар жолда Тимофей Скатов болгариялық әріптесі Димитар Кузмановпен бірге Александр Мерино (Аустрия) және Кристоф Негриту (Германия) жұбын жеңді. Тартысты кездесу сетке жалғасып, Скатов пен Кузманов кездесуді 7:5, 6:1 есебімен аяқтады. Енді ол жұптық сында жартылай финал жолдамасын сарапқа салады.
Бұған дейін тағы бір қазақстандық теннисші Михаил Кукушкин АҚШ-та басталған Индиан-Уэллс мастерс турнирін жеңіспен бастаған болатын. Ол іріктеу жарысының финалдық кезеңіне шығып, Индиан-Уэллс турнирінің негізгі бәсекесіне жолдама алу үшін шешуші сында өнер көрсетеді.