Елена Рыбакина Римдегі турнирді жеңіспен бастады

Қазақстандық теннис жұлдызы Елена Рыбакина Италия астанасы Римде өтіп жатқан WTA 1000 сериясындағы турнирдің алғашқы ойынын сенімді жеңіспен аяқтады.

Турнирге екінші айналымнан қосылған әлемнің 12-ракеткасы Елена Рыбакина германиялық теннисші, әлемдік рейтингте 63-орында тұрған Ева Лиспен кездесті. Ойын тартысты өрбіді: алғашқы сетте қарсыласы 4:2 есебімен алға шыққанымен, Рыбакина есепті теңестіріп, тай-брейкте 7:6 (7:3) нәтижесімен басым түсті.

Екінші партияда қазақстандық спортшы толық басымдық танытты. Есеп 2:2 болған сәттен бастап қатарынан бірнеше гейм ұтып, 6:2 нәтижесімен матчты жеңіспен аяқтады.

Ойын жалпы бір сағат 25 минутқа созылды. Осы уақыт ішінде Рыбакина 4 эйс орындап, 7 мүмкіндіктің бесеуінде брейк жасап үлгерді. Ал Ева Лис 1 эйс пен 3 брейкпен ғана шектелді.

Келесі айналымда Елена хорватиялық Донна Векич (WTA №19) пен канадалық Бьянка Андрееску (WTA №121) арасындағы кездесудің жеңімпазымен сынға түседі.

Айта кетейік, бұл жеңістен кейін Рыбакина WTA Live рейтингісінде 11-сатыға көтерілді.