Махачевтің Маддаленамен айқаста қанша табыс тапқаны анықталды

Алмас Ахметов

Автор

17.11.2025, 18:04

Махачев UFC тарихында екі дивизионда чемпион атанған алғашқы ресейлік болды

Махачевтің Маддаленамен айқаста қанша табыс тапқаны анықталды

championat.com

АҚШ-тағы Sporty Salaries порталының дерегінше, UFC-дің жартылай орта салмақтағы су жаңа чемпионы Ислам Махачев аустралиялық Джек Делла Маддаленамен өткен жекпе-жегі үшін 3,332 млн доллар сыйақы алды.

Қаражат былай бөлінген:

800 мың доллар – октагонға шыққаны үшін;
32 мың доллар – демеушілік келісімдер;
2,5 млн доллар – PPV (ақылы трансляциялар) сатылымынан түскен үлес.

Ал оның қарсыласы Маддалена 1,992 млн доллар табыс тапты:

750 мың доллар – жекпе-жекке қатысқаны үшін;
42 мың доллар – демеушілерден;
1,2 млн доллар – PPV-ден түскен табыс.

Ресейлік Ислам Махачев Нью-Йоркте өткен UFC 322 турнирінде аустралиялық Джек Делла Маддаленаны жеңді. Жартылай орта салмақта (77,1 келі) өткен айқас кештің басты жекпе-жегі болып, толық бес раундқа созылды.

Чемпиондық атақ сарапқа салынған кездесуде Махачевтің басымдығы айқын көрінді: төрт рет тейкдаун жасап, партердегі бақылау уақыты бойынша жеке рекордын жаңартты. Сонымен қатар дәл тиген соққылар саны жөнінен де үстем болды – 140 соққыға қарсы 30. Нәтижесінде үш төреші де 34 жастағы Махачевті жеңімпаз деп тапты – 50:45.

Осылайша Ислам Махачев UFC тарихында екі дивизионда чемпион атанған алғашқы ресейлік болды. Бұған дейін ол жеңіл салмақ дәрежесінде (70,3 келі) белбеу иесі атанған, бірақ Делла Маддаленамен жекпе-жек үшін титулдан бас тартқан еді.