Оның бұған дейінгі талаптарының біразы орындалмаған
Мәжіліс депутаты, аралас жекпе-жек шебері Ардақ Назаров Түркістан қаласында арақ сатуға тыйым салу керек деп есептейді. Мұндай пікірін ол Мәжілістің алқа отырысында айтып, Үкіметке депутаттық сауалын жолдады.
«Түркістанда арақ сатуға, ішуге, ішіп алып ләйліп жүруге заң аясында тыйым салсақ… Өйткені, Түркістанды білесіз, рухани астана деп отырмыз, бүкіл қазақ осы жерден рух алуы керек. Ол жерде біздің бабаларымыз, әулие, би, батырларымыз жатыр. Ертең шетелден көп қонақтар келеді, сол кезде біздің азаматтарымыз арақ ішіп алдынан шығатын болса ұят қой?! Сондықтан заңның аясында «арақсыз қала, рухани қала» деп араққа тыйым салуға болады ма?», - деді Назаров өзінің депутаттық сауалында.
Айта кетейік, Мәжіліске алғаш келген уақытта Ардақ Назаров ЛГБТ қозғалысына тыйым салуды сұраған болатын. Алайда, оның бұл өтініші жауапсыз қалды.
Сондай-ақ, жуырда Талғарда Шерзат Болат есімді жасөспірім қаза тауып, артынша үйі өртенген кезде кезде Ардақ Назаров оқиға орнына барып, фото-видеоға түсіп қайтқан болатын. Артынша осы әрекеті үшін әлеуметтік желіде қатаң сынға ұшырады.
