VADA Жәнібектің қанынан қандай препарат тапқанын ресми мәлімдеді
Әлімханұлы бұл дәріні ешқашан қолданбағанын айтты
WBO мен IBF нұсқалары бойынша орта салмақтағы әлем чемпионы Жәнібек Әлімханұлының допинг сынамасынан табылған тыйым салынған заттың атауы белгілі болды.
BoxingScene дерегінше, ерікті допингке қарсы қауымдастық (VADA) қазақстандық боксшының анализінен мельдонийді анықтаған.
Мельдоний – Шығыс Еуропаның бірқатар елдерінде рецепт арқылы берілетін препарат. Алайда Әлімханұлы бұл дәріні ешқашан қолданбағанын айтып, табылған затқа қатысты күмән тудырды.
Бұл препарат 2016 жылдан бастап Дүниежүзілік допингке қарсы агенттік (WADA) тізімінде толық тыйым салынған. Себебі мельдоний ағзаның төзімділігін күшейтіп, қалпына келу процесін жеделдететін метаболизмге әсер етеді.
Әдеттегідей, спортшы «В» үлгісін тексеруді талап етуге құқылы. Бұл үлгі алғашқы нәтижені растау үшін қайта қаралады. Айырмашылықтың болуы сирек кездеседі, дегенмен бұған дейін кей боксшылар күдікке ілінгеннен кейін екінші тесттен таза шыққан жағдайлар бар.