Қазақ пен өзбек боксшыларының арасындағы жойқын айқас алғашқысының жеңісімен аяқталды (ВИДЕО)
Өзбек боксшысы бұған дейін кәсіпқой бокста бірнеше жекпе-жек өткізген
Шымкентте өтіп жатқан бокстан Қарақозы Абдалиев атындағы халықаралық турнирде 60 келі салмақ дәрежесінде Қазақстан мен Өзбекстан боксшыларының тартысты жекпе-жегі өтті.
Қазақстан намысын қорғаған қарағандылық Талғат Сырымбетов өзбек өкілі Абдували Бурибоевпен жұдырықтасқан болатын. Бұл бәсекеде төрешілер жеңісті 4:1 есебімен қазақ боксшысына берді.
19 жастағы Бурибоев жастығына қарамастан кәсіпқой бокста сегіз жекпе-жек өткізіп үлгерген екен. Оның бәрінде жеңіске жетсе, алтауын нокаутпен аяқтаған.
Еске салайық, бұған дейін Қазақстан ұлттық құрамасының бірнеше боксшысы алғашқы жекпе-жектерін жеңіспен бастаған еді. Олардың қатарында Санжар Тәшкенбай, Сәкен Бибосынов, Махмұт Сабырхан, Мұхамедсабыр Базарбайұлы және Айбек Оралбай да бар.