Төрехан Сабырхан мен танымал актер спарринг өткізіп, қызу талқыға түсті (ВИДЕО)

Бокстан жастар арасында әлем және Азия чемпионы, ел біріншілігінің жеңімпазы Төрехан Сабырхан белгілі актер Еркебұлан Тоқтармен спаррингтік жекпе-жек өткізді.

Жаттығу барысында белгілі Еркебұлан Тоқтар жас боксшыға қарсы тәуір жұдырықтасқаны желіде таралған бейнежазбада анық байқалады. Көпшілік талқысына түскен екеудің өнеріне жанкүйерлер пікір білдіріп, Төреханның өнеріне жоғары баға берген.

«Төреханның жылдамдығына сөз жоқ», «Рингті екеуі де сезінеді», «Мықты болғың келсе, мықтымен сынға түсу керек», «Актер болса да мықты спортшы», - деген сыңайда пікір жазып қалдырған.

67 келіде өнер көрсететін Төрехан Сабырхан былтыр жастар арасында әлем және Азия біріншілігінде топ жарған болатын. Желтоқсан айының соңында ол Қарағандыда ересектер арасында өткен ел чемпионатында топ жарды. Финалда оның қарсыласы атанған С.Төлтаев денсаулығына байланысты жекпе-жекке шыққан жоқ. Осылайша жастардан ересектер құрамасына ауысқан ол алда маңызды турнирлерде бақ сынайтын болады.

Еркебұлан Тоқтар актер ретінде көпшілікке танымал. Дегенмен, ол спортта өзінің бағын сынап, алдағы күндері кәсіпқой бокста бағын сынап көруге бел буып отыр.