Кәсіпқой боксшы Фируза Шарипова рингке қайта оралмақ
Спортшы биыл 31 жасқа толады
Белгілі кәсіпқой боксшы Фируза Шарипова жақын арада рингке қайта оралуды жоспарлап отырғанын мәлімдеді.
Бұл туралы спортшы SPORT+ арнасына берген пікірінде атап өтті.
«Қазіргі уақытта командаммен жұмыс істеп жатырмын. Алдын ала айтқым келмейді. Бірақ белсенді түрде дайындық жұмыстары жалғасып жатыр. Барымды салып, жаттығудамын. Жақын арада бәрін білетін боласыздар», - деді Фируза Шарипова.
Фируза Шарипова өзінің соңғы кәсіпқой жекпе-жегін 2022 жылдың желтоқсанында өткізген болатын. Сол жолы ол танзаниялық Фериче Машориді төрешілердің шешімімен жеңген еді. Осыдан кейін спортшы өзін ММА спортында да сынап көрді.
Фируза Шарипова биыл 29 тамызда 31 жасқа толады. Қарағанды облысында дүниеге келген ол бірнеше халықаралық титулдарға ие болған. Оның ішінде WIBA, IBO және WBU нұсқалары бойынша чемпиондық белбеулерге қол жеткізді.