Бокстан Әлем кубогі: аса ауыр салмақтағы Даниял Сапарбай жартылай финалға шықты
02.04.2025, 01:43
Жартылай финалда Даниялды өзбек боксшысы Жахонгир Зокиров күтіп тұр
Қазақстан бокс федерациясы
Бокстан Бразилияда өтіп жатқан Әлем кубогінде аса ауыр салмақта (+92 кг) өнер көрсетіп жатқан Даниял Сапарбай алғашқы жекпе-жегінде жеңіске жетіп, жартылай финалға шықты.
Ширек финалда қазақ боксшысы үндістандық Нарендермен жұдырықтасты. Қарсылас – 2023 жылғы Азия ойындарының қола жүлдегері. Тартысты өткен жекпе-жекте төрешілер жеңісті 3:2 есебімен Сапарбайға берді.
Енді жартылай финалда Даниял Сапарбай өзбекстандық 2024 жылғы Азия чемпионатының қола жүлдегері Жахонгир Зокировпен финалға жолдаманы сарапқа салады.
Айта кету керек, бүгін жарыс жолына шыққан тағы бір қазақстандық Талғат Сырымбетов (60 кг) бразилиялық Луис Оливейрадан жеңіліп қалды.
Жарнама
Жарнама