Магомед Адиев Абат Айымбетовтің басты проблемасын атады
Шабуылшы қыркүйекте Қазақстан құрамасының ойынына шақырту алған
Футболдан Қазақстан құрамасының экс-бас бапкері Магомед Адиев «BorodAbata» ютуб-каналына берген сұхбатында шабуылшы Абат Айымбетовтің басты проблемасын атады.
Айта кетейік, Түркияның «Адана Демирспор» клубында ойнайтын қазақстандық форвард үнемі қосалқы құрамда отырып, матчқа сирек шығады.
- Айымбетов өткен маусымда бір гол соғып, тағы екі голы саналмады. Үнемі ойынның соңында алаңға шығады. Қалай ойлайсыз, биылғы маусымда ол өзін жақсы қырынан көрсете ала ма?
- Көрсетеді деп үміттенем. Оның жақсы қасиеті бар – үнемі өзінің мықты екенін дәлелдеуге тырысады. Ол қанша гол қажет болса, сонша гол соға алатын футболшы. Бірақ, оның басты проблемасы – жарақаты бар. Салдарынан Абат бүкіл жаттығу процесін жоғары деңгейде өткізе алмады. Тіпті, ұлттық құраманың оқу-жаттығу жиындарына да дұрыстап қатыса алған жоқ. Мен онымен бұл тақырыпта сөйлесіп, қарқынын жоғалтып алғанын айттым. Оның басты ерекшелігі – үнемі қысым көрсетуінде. Бірақ, қазір бұл қасиетінен айрылып қалды. Егер соңғы жаттығуларын жоғары деңгейде өткізе алса, қайта бабына келеді деп ойлаймын. Абат – Түркия чемпионатының деңгейіне лайықты футболшы, - деді Адиев.
Еске салайық, Абат Айымбетов «Адана Демирспор» сапына биыл ақпан айында ауысты. Оның келісімшарт мерзімі 2025 жылдың 30 маусымына дейін.