Қуат Хамитов Станислав Черчесовке араша түсті
Оның сөзінше, Қазақстанның қазіргі футболшылары жеңілістің бәріне кінәлі
Футболдан Қазақстан ұлттық құрамасының қатарынан үш ойында жеңілуіне бас бапкер Станислав Черчесовтың еш кінәсі жоқ деп есептдейді белгілі файтер Қуат Хамитов.
Айта кетейік, Ұлттар лигасында өнер көрсетіп жатқан Қазақстан құрамасы топтық кезеңде төрт ойынның біреуінде тең ойнап, үшеуінде жеңілді. Осы төрт матчта Черчесов шәкірттері бірде-бір гол соға алған жоқ.
«Қазір көпшілік бас бапкерді айыптап жатыр. Бірақ, сенің шәкірттерің «қапшық» болса оған бапкер түк те көмектесе алмайды. Тек футболда емес, бізде мұндай жағдай күресте де, басқа да спорт түрлерінде болды. Әлсіздерден супермен жасай алмайсың. Қандай мықты бапкер келсе де Қазақстан футболшыларынан мықты ойыншы жасай алмайды. Соны түсінуіміз керек.
Алдағы 5-10 жылда ересектер футболымен айналысу – уақытты босқа өлтіру. Оларды өз бетімен жіберу керек. Ал, бөлініп жатқан ақшаны балалар футболына жұмсаған абзал. Қазіргі 7-8 жастағы балалар ғана қазақ футболын болашақта өзгерте алады», - дейді MMA файтері Legalbet сайтына берген сұхбатында.
Қазақстан құрамасы Ұлттар лигасында Норвегиямен 0:0 есебімен тең ойнаса, қалған үш матчта өз қақпасына 8 гол жіберіп алды. Черчесовтың өзі болса құрама команданың ойынына көңілі толатынын айтып отыр.