Мессидің командасы ширек финалға өте алмады

Аргентиналық шабуылшы Лионель Месси өнер көрсететін американдық «Интер Майами» клубы АҚШ чемпионатының плей-офф кезеңінен шығып қалды.

Жоғары футбол лигасының (MLS) 1/8 финалында «Интер Майами» «Атлантамен» кездесті.

Бірінші матчта Мессидің командасы жеңіске жеткен (2:1), алайда екінші кездесуде қарсыластар таразы басын теңестіріп, келесі кезеңге кімнің өтетіні үшінші ойында анықталатын болды.

Шешуші матч «Интер Майами» стадионында өтті. Алаң иелері сапынан Матиас Рохас 17-минутта мергендік танытып, ұжымын алға шығарған. Дегенмен бірнеше минут ішінде қарсыластар екі гол соғып, есепте алға шықты. Джамал Тьяре дубль авторы атанды. Ал 65-минутта Лионель Месси допты қақпаға баспен бағыттап, таразы басын теңестірді.

«Атланта» сапынан 76-минутта Бартош Слиш үшінші голды соғып, ойынның нүктесін қойды. Кездесу «Атлантаның» жеңісімен аяқталды – 2:3.

Осылайша, турнирдің фавориті саналған «Интер Майами» плей-оффтан бірінші кезеңде-ақ шығып қалды. Естеріңізде болса, қазан айының басында клуб тұрақты чемпионатта мерзімінен бұрын жеңіске жеткен.