Қазақстанның жас футболшылары Еуропа чемпионатында сенсация жасады
Келесі ойын әйгілі Нидерланды құрамасымен
Қазақстанның 19 жасқа дейінгі жастар құрамасы 2025 жылғы Еуропа чемпионатының іріктеу кезеңін сәтті бастады.
Александр Кузнецов шәкірттері алғашқы ойынында Украина құрамасымен кездескен. Алғашқы минуттан бапкер алаңға мына ойыншыларды шығарды: Мендіғалиев, Саидов, Елемес, Ерлан, Исраилов, Примбердиев, Дүйсенбек, Агиманов, Әбіл, Серікұлы, Бағдат.
Ойын тең дәрежеде өтті. Бірақ Қазақстан жасөспірімдері өз мүмкіндіктерін тиімді пайдаланды. Үзіліске дейін «Екібастұз» ойыншысы Тамерлан Агиманов дубль жасады.
Екінші кезеңде Украина пенальтиден бір гол салып, есеп қысқартқанымен, одан әріге шамасы жеткен жоқ. Сөйтіп Қазақстан 2:1 есебімен жеңіске жетті.
Аталған матч алдында Қазақстан аутсайдер саналған. Енді жерлестеріміз 16 қарашада Нидерландымен кездеседі.
Айта кетейік, бірінші топтың ойыны Ассен (Нидерланды) қаласында өтеді. Әр топтан келесі кезеңге екі команда шығады. Сондай-ақ, үшінші орындардың ішінде ең көп ұпай жинағаны да көктемде Португалияда өтетін элиталық раундқа жолдама алады.