Зәкір Найманбаев алғашқы соққысымен қарсыласын сұлатып түсірді

Қазақстандық Зәкір Найманбаев Нью-Орлеанда өткен Power Slap 14 турнирінде америкалық Купер Хауслиді бір соққысымен-ақ есінен тандырды.

Жеребе бойынша кездесуді алдымен Хаусли бастады. Найманбаев оның соққысына төтеп беріп, өз кезегінде қарсыласын бірден нокаутқа жіберді.

Бұл – 31 жастағы Зәкір Найманбаевтың Power Slap лигасындағы үшінші жекпе-жегі. Ол биыл 30 қаңтарда Абу-Дабиде Троэль Нильсенді нокаутқа түсіріп, 10 000 доллар бонус ұтып алған болатын. Ал 28 маусымда ереже бұзғаны үшін дисквалификация алды, дегенмен сол жолы да Брайс Джонсонды алғашқы соққымен-ақ сұлатып түсірген еді.

Найманбаев қазіргі таңда Семей қаласында тұрады. Оның шағын отбасылық бизнесі бар, одан қалды дене шынықтыру пәнінің мұғалімі болып жұмыс істейді.

Зәкір – пауэрлифтингтен Азия чемпионы, бір кездері иығына қошқарды салып отырып тұрудан да үздік атанған, сонымен қатар Амиран Сардаровтың «Хача күнделігі» жобасындағы «Шапалақ шайқасына» қатысқан.