Танымал тәжікстандық спортшы Жалғас Жұмағұловты жекпе-жекке шақырды
37 жастағы Жұмағұлов – Oktagon MMA лигасының аса жеңіл салмақтағы чемпионы
RCC лигасында өнер көрсетіп жүрген тәжікстандық спортшы, ММА жауынгері Халим Назрулоев (12-0) танымал қазақстандық файтер Жалғас Жұмағұловпен (18-9) жекпе-жек өткізгісі келетінін айтты.
«Біз бұл туралы жаттықтырушыммен ұзақ сөйлестік. Жалғаспен төбелескім келеді. Ол кезде оның Oktagon-мен келісімшарты бар еді. Мен оған үлкен құрметпен қараймын. Ол Fight Nights-тың чемпионы болды, енді Oktagon-да да белбеу иеленді», – деді Назрулоев Take Down басылымына берген сұхбатында.
Назрулоев соңғы жекпе-жегін биыл қыркүйекте Ресейдің Челябинск қаласында өткізіп, бразилиялық Веллитон да Силваны (10-4) сабмишнмен жеңген.
Ал Жалғас Жұмағұлов (18-9) жақында ғана өзінің титулдық айқасы туралы ресми мәлімдеме жасады.
Еуропаның беделді Oktagon MMA лигасының чемпионы Жұмағұлов чехиялық файтер Давид Дворжакпен (22-6) кездесіп, белбеуін қорғайды. Дворжакты жанкүйерлер «Қабірші» (The Undertaker) деген лақап атпен таниды. Айқас 28 желтоқсанда Прагада (Чехия) өтеді.
«Мен белбеуді қорғамаймын – мен оның нағыз иесі кім екенін дәлелдеп жатырмын», – деп жазды Жұмағұлов Instagram парақшасында.
Айта кетейік, 37 жастағы Жұмағұлов – Oktagon MMA лигасының аса жеңіл салмақтағы чемпионы. Ол чемпиондық белбеуін алғаш рет қорғамақ. Ал Дворжак титул үшін күрес құқығына Octagon 75 турнирінде неміс файтері Мохаммед Вали́дті (8-5) бірінші раундта нокаутқа жіберген соң ие болды.