ХОК еркін күрестен екі балуанның олимпиадалық жолдамасын кері қайтарды
Бұл салмақта Қазақстаннан Нұрқожа Қайпанов лицензиялық үш турнирге қатысып, бәрінде жеңіліп қалды
Халықаралық Олимпиада комитеті Ресей мен Беларусь елінің еркін күрестен 74 келіде белдесетін екі балуанын Париж додасына қатыстырмау туралы шешім шығарды.
Енді ХОК олар иеленген жолдаманы өзге елдің спортшыларына бермек. 74 келіде Беларусь атынан күресетін Магомедхабиб Кадимагомедовті сол елде тұратын этникалық қазақ бапкері Жұматай Шубаев жаттықтырады. Алайда, оның жолдамасы енді Италия балуаны Франк Чамизоға берілуі мүмкін.
Сонымен қатар, Ресей өкілі Заурбек Сидаков та Кадимагомедовтің кебін киіп отыр. Еркін күрестен 74 келіде сынға түсетін балуан жолдамасы Ресей құрамасынан кері қайтарылатыны белгілі болды. Бұл лицензия да қай елдің балуанына берілетіні таяу күндері анықталады.
Еске салсақ, Қазақстан құрамасының аталған салмақта Нұрқожа Қайпанов күреседі. Ол Париж жолдамасы үшін үш турнирге қатысып, барлығын да нәтижесіз аяқтаған болатын.