«Жылдың үздік дзюдошысы»: Елдос Сметов пен Ғалымжан Қырықбай IJF сыйлығына үміткер
«IJF Judo Awards 2024» жүлдесіне 8 аталым бойынша 63 кандидат ұсынылған
Қазақстандық дзюдошылар Халықаралық дзюдо федерациясының «IJF Judo Awards 2024» жүлдесінің екі номинациясы бойынша үміткер атанды.
Халықаралық дзюдо федерациясы 2024 жылғы спорт маусымын қорытындылайтын «IJF Judo Awards 2024» жүлдесінің үміткерлер тізімін жариялады. Олимпиада чемпионы Елдос Сметов «Ерлер арасындағы жылдың үздік дзюдошысы (Male Judoka of the Year)», ал Ғалымжан Қырықбай «Үздік иппон (Best Ippon)» аталымдары бойынша үміткерлер қатарына қосылған.
«Ерлер арасындағы жылдың үздік дзюдошысы (Male Judoka of the Year)» аталымы бойынша Париж Олимпиадасының 7 чемпионы үміткер болса, «Үздік иппон (Best Ippon)» аталымында 20 дзюдошының таңдаулы әдістері іріктелген.
Атап айтқанда, қазақстандық Ғалымжан Қырықбайдың Тблисиде өткен әлемдік Grand Slam жарысындағы әдісі үздіктер қатарынан табылған.
«IJF Judo Awards 2024» жүлдесіне 8 аталым бойынша 63 кандидат ұсынылған. Үздіктерді анықтау екі кезеңнен тұрады. Бірінші кезең - онлайн дауыс беру, екінші кезең - IJF Judo Awards комитетінің қысқаша тізімнен таңдауы .