«Қазақстан барысы» атанған Ерасыл Қажыбаев жол көлік оқиғасына ұшырады
Оның айтуынша, жол ережесін қарсы бағыттағы көлік жүргізушісі бұзған
«Қазақстан барысы-2024» турнирінің жеңімпазы Ерасыл Қажыбаев жол көлік апатынан аман қалды.
Бұл туралы спортшының өзі әлеуметтік желіде жазба жариялады. Оның айтуынша, жол ережесін қарсы бағыттағы көлік жүргізушісі бұзған. Сонымен бірге, оқыстан болған оқиғадан спортшы зардап шекпеген.
«Құрметі достар! Менде барлығы дұрыс. Кеше кішігірім жол апаты болды. Сол оқиғаға қатысы бар ағамыз "бауырым, кешір! Ренжімеші. Көрмедім, байқамай қалдым" деп айтып жатыр. Пенде болғаннан кейін ол бәрі басымызда болуы мүмкін. Сөйтіп қол алысып, екі жаққа кеттік. Ренжіспедік. Жолда абай болайық. Қазір ауа райы өте қолайсыз болып жатыр. Сол үшін назарды басқа жаққа аудармай жолға қарап жүріңіздер», - деді спортшы.
Ерасыл Қажыбаев былтыр қазақ күресінен Астанада өткен республикалық турнирде финалға шығып, шешуші белдесуде шымкенттік Ерсұлтан Мұзафаровтан басым түскен еді. Осыдан кейін оған Абай облысының әкімі үш бөлмелі пәтер сыйласа, демеушілер атынан көлік тарту етілетіні айтылды.
Семейлік балуан осымен «Қазақстан барысының» үшінші рет финалына шықты. Ол 2018 жылы Ержан Шынкеевке есе жіберсе, 2019 жылы өзінің жерлесі Айбек Нұғымаровға жол берген.