Албаниядағы күрестен әлемдік турнирдің бірінші күні қазақ балуандары үш медаль олжалады
Жарыс жолына әлі грек-рим күресі мен қыздар күресінің балуандары шығады
Тиранада (Албания) күрес түрлерінен әлемдік рейтингтік турнир басталды. Жарыстың алғашқы күнінде өнер көрсеткен қазақстандық еркін күрес балуандары үш медаль олжалады.
Алғашқы медальді қоржынға 86 келіде күрескен Болат Сақаев салды. Ол бірінші айналымда өзге қазақстандық Данияр Қайсановтан басым түсті. Ширек финалда қырғыз балуаны Мухаммад Абдуллаевты 6:1 есебімен жеңіп, жартылай финалға шықты. Жартылай финалда грузиялық Тариэль Гаприндашвилимен күресті. Тартысты белдесуде гүржі балуанын сан соқтырды (4:4 -:+). Финалда АҚШ балуаны Чендлер Марстеллерге есе жіберді.
Болат Сақаев бұған дейін 79 келіде күресіп келген. Сол салмақта 2023 жылы Азия чемпионатында топ жарған. Жаңа салмаққа ауысып, әлемдік үлкен додада алғаш рет медаль олжалап отыр.
86 келіде күрескен тағы бір қазақстандық Рустам Мырзағалиев қола медаль алды. Үшінші орын үшін күресте ол польшалық Себастьян Езержанксиден айласын асырды.
Одан бөлек 61 келіде сынға түскен Мұхамед Балғабай да қола жүлдеге ие болды. Балғабай қола медаль үшін белдесуде Болгариялық Стилян Илиевті 7:0 есебімен қапы қалдырды.
Айта кетейік, турнир 2-наурызда аяқталады.