Александр Бублик US Open турнирін жеңіспен бастады
Қазақстандық спортшы екінші айналымда хорватиялық Дино Прижмичпен кездеседі
Қазақстанның бірінші ракеткасы Александр Бублик АҚШ ашық чемпионатының екінші айналымына шықты.
Қазақстандық теннисші алғашқы кезеңде америкалық Джей-Джей Вольфпен кездесіп, 6:4, 6:2, 3:6, 6:1 есебімен жеңіске жетті. Матч 2 сағат 13 минутқа созылды.
Бублик алғашқы екі сетте басымдық танытқанымен, үшінші партияда қарсыласына жол берді. Алайда төртінші сетте қайта қарқын қосып, кездесуді сенімді жеңіспен аяқтады.
Бұған дейін теннисшілер төрт рет кездесіп, оның үшеуінде Вольф жеңген еді. Ал олардың 2023 жылғы Уимблдондағы соңғы матчында Бублик басым түскен.
Қазақстандық спортшы екінші айналымда хорватиялық Дино Прижмичпен кездеседі. Прижмич алғашқы кезеңде аргентиналық Тьяго Агустин Тирантені бес сетте жеңді.