Рыбакина Уимбилдон турнирінің ширек финалына жолдама алды
Алғашқы сетте Рыбакина 6:3 есебімен алға шықты
Қазақстандық теннисші Елена Рыбакина Лондонда өтіп жатқан Уимбилдон турнирінің ширек финалына шықты.
Ол 1/8 финалда бейтарап ту астында сынға түскен ресейлік теннисші Анна Калинскаямен шеберлік байқасқан болатын. Алайда әлемдік рейтингте 18-орында тұрған Калинская екінші сетте ойынды жалғастырудан бас тартты.
Алғашқы сетте Рыбакина 6:3 есебімен алға шықты. Ал екінші партиядан отандасымыз қатарынан екі рет брейк жасап, 3:0 есебімен басымдықты қолға алған еді. Нәтиже бойынша артта қалған Калинская 51-минутта ойынды жалғастыруға құлықты болмады.
Ширек финалға шыққан Елена Рыбакина енді украиналық Элина Свитолина мен қытайлық Синьюй Ван жұбының жеңімпазымен шеберлік байқасады.
Рыбакина бұған дейін Дания теннисшісі Каролин Возняцкиді, германиялық Лаура Зигемундты ұтқан болатын. Әлемнің 4-ші ракеткасы аталған турнирдегі басты фавориттердің бірі.