Кездесу 2027 жылғы 23 қаңтарда Данияның Хорсенс қаласында өтеді
Қазақстандық боксшы Жәнібек Әлімханұлы мен Дания өкілі Якоб Банк арасындағы чемпиондық жекпе-жектің билеттері 28 қазанда сатылымға шығады. Кездесу 2027 жылғы 23 қаңтарда Данияның Хорсенс қаласында өтеді. Боксшылар суперорта салмақтағы WBO ұйымының бос тұрған чемпиондық белбеуіне таласады.
Ұйымдастырушылар билет құнын 699 дат кронынан бастаған. Бұл қазіргі бағам бойынша шамамен 47 мың теңгеге тең.
Хорсенстегі кездесу Данияда ұзақ үзілістен кейін өтетін маңызды титулдық айқастардың бірі болмақ. Бұған дейін елде мұндай деңгейдегі чемпиондық жекпе-жек 2012 жылғы желтоқсанда ұйымдастырылған. Сол кезде Миккель Кесслер Хорсенсте британдық Брайан Мэджиді нокаутқа түсіріп, WBA тұжырымы бойынша чемпиондық белбеуін қорғаған.
Жәнібек Әлімханұлы кәсіпқой бокста осы уақытқа дейін 17 рет жеңіске жетіп, оның 12-сін нокаутпен аяқтаған. Ал Якоб Банктің еншісінде 20 жеңіс бар, оның 11-і мерзімінен бұрын тіркелген. Екі боксшы да әзірге жеңілістің не екенін білмейді.
Қазақстандық былғары қолғап шебері соңғы кездесуін 2025 жылғы 5 сәуірде өткізіп, француз Ануэль Нгамиссенгені нокаутпен жеңген. Ал Якоб Банк 2026 жылы үш жекпе-жекке қатысқан. Ол Ску́лл мен намибиялық Нджолонимоны нокаутпен ұтып, поляк Павел Августыникті төрешілердің бірауыздан шығарған шешімімен жеңді.
Әлімханұлы үшін алдағы кездесу кәсіпқой мансабындағы суперорта салмақтағы алғашқы жекпе-жек болмақ. Бұған дейін ол орта салмақта IBF және WBO тұжырымдары бойынша чемпиондық белбеулерді иеленген. Әуесқой бокста да қазақстандық спортшы бұл салмақта табысқа жеткен: 2013 жылы әлем чемпионатында, 2014 жылы Азия ойындарында 75 келіге дейінгі салмақта алтын медаль жеңіп алған.
Ордабасы
Қайрат
Астана
Оқжетпес
Ақтөбе
Елімай
Тобыл
Ұлытау
Каспий
Жеңіс
Қызылжар
Атырау
Ертіс
Жетісу
Алтай
Қайсар
