Ол 5 сәуірде украиналық боксшымен жұдырықтасады
Өзбекстандық боксшылар Баходир Джалолов пен Отабек Холматов бапкерлерімен бірге Қазақстанға аттанды. Бұл туралы Өзбекстанның Кәсіпқой бокс федерациясы мәлімдеді.
Былғары қолғап шеберлері 5 сәуірде Астанада өтетін бокс кешінде өнер көрсетеді. Кештің басты жекпе-жегі орта салмақта WBO және IBF нұсқалары бойынша әлем чемпионы – қазақстандық Жәнібек Әлімханұлы (16-0, 11 KO) мен француз Ануаэль Нгамиссенге (14-0, 9 KO) арасында өтеді.
Супер ауыр салмақтағы Жалолов (14-0, 14 KO) украиналық Игорь Шевадзуцкиймен (12-2, 10 KO) қолғап түйістірсе, Холматов жартылай жеңіл салмақта филиппиндік Джейсон Кано Манигосқа (30-12-2, 20 KO) қарсы жекпе-жек өткізеді.
Сонымен қатар, бұл бокс кешінде Батыр Жүкембаев, ағайында Махмұд пен Төрехан Сабырхандар, Балауса Мұздыман да рингке шығады деп күтілуде.
