Бұл қадам клубтың қаржылық тұрақтылығын нығайтуға бағытталған.
Елімізде футбол клубтарын жекешелендіру үдерісі жалғасуда.
Қостанайдың «Тобыл» футбол клубының жаңа бас құрылтайшысы болып ERG компаниясының директорлар кеңесінің төрағасы әрі бас атқарушы директоры Шухрат Ибрагимов тағайындалады.
Клуб дерегінше, бұл шешім клубтың басқару жүйесі мен қаржылық тұрақтылығын нығайтуға бағытталған. Сонымен қатар кәсіби спорттағы заманауи корпоративтік басқару қағидаларын енгізуге мүмкіндік береді.
«Ірі индустриялық серіктестің тартылуы қостанайлық клуб үшін жаңа мүмкіндіктерге жол ашады. Атап айтқанда, клуб инфрақұрылымын дамытуға, спорттық құрамды күшейтуге және ішкі чемпионат пен халықаралық аренадағы бәсекеге қабілеттілікті арттыруға жағдай жасалмақ», - деп нақтылады ұжымның баспасөз қызметі.