Ислам ойындарынан кейін федерация Ризабек Айтмұқанға қатысты шешім қабылдады

Алия Алиева

Автор

27.11.2025, 17:49

Бұған дейін грек-рим күресінің бас бапкері Қонысбек Төкенов те Айдос Сұлтанғалидың ел чемпионатына қатыспайтынын хабарлаған еді.

Ислам ойындарынан кейін федерация Ризабек Айтмұқанға қатысты шешім қабылдады

ҰОК

2025 жылдың 1-6 желтоқсан аралығында Алматыдағы «Almaty Arena» спорт кешенінде ересектер арасында грек-рим, еркін және әйелдер күресінен Қазақстан чемпионаты өтеді.

Ел біріншілігіне еліміздің барлық өңірінен 1000-ға жуық балуан қатысады.

Алайда биылғы жылдың басты бәсекесіне бірқатар әйгілі спортшылар қатыспайды. Олардың қатарында:

әлем чемпионы Ризабек Айтмұхан,
әлем чемпионы Нұрқожа Қайпанов,
әлем чемпионы Айдос Сұлтанғали,
Париж Олимпиадасының күміс жүлдегері Демеу Жадыраев бар.

Еркін күрестен ұлттық құраманың бас бапкері Мадияр Құрамысов бұл жағдайды былай түсіндірді:

«Айтмұхан мен Қайпанов ресми түрде чемпионаттан босатылды. Олар жақында ғана Сауд Арабиясындағы Ислам ынтымақтастығы ойындарына қатысты. Сонымен қатар олар қатысатын салмақ дәрежелерінде ішкі бәсекелестік айтарлықтай жоқ».

Соған қарамастан, жарыста көптеген мықты балуандар жүлде үшін сынға түседі. Олардың ішінде:

әлем чемпионатының төрт дүркін жүлдегері Жәмила Бақбергенова,
U23 әлем чемпионы Шұғыла Өмірбек,
жасөспірімдер әлем чемпионы Нилуфар Раимова,
Рио Олимпиадасының қола жүлдегері Эльмира Сыздықова,
U23 әлем чемпионы Сұлтан Әсетұлы,
жастар әлем чемпионы Исхар Курбаев,
әлем чемпионатының қола жүлдегері Асылжан Есенгелді және басқа да танымал спортшылар бар.

Чемпионат қорытындысы бойынша 2026 жылғы Азия чемпионатына және халықаралық турнирлерге қатысатын Қазақстан ұлттық құрамасы жасақталады.