Оның денсаулығына қатысты кез келген ақпарат әйелінің сұрауымен құпия сақталып келеді
2013 жылы ауыр жарақатына байланысты арбаға таңылып қалған автошабандоз Михаэль Шумахердің жағдайына қатысты тың жаңалық пайда болды.
RTL журналисі Феликс Горнердің айтуынша, 56 жасқа толған экс-спортшының жағдайы күрт нашарлап кеткен. Ол осы күнге дейін Шумахерлер отбасына ең жақын адамдардың бірі болған еді.
«Жағдайы өте нашар, үнемі айналасындағылардың көмегіне мұқтаж. Бұрын өзіне қажетін ишарамен білдіріп келген болса, қазір оны да істей алмай қалды», – деді журналист.
«Формула-1-дің» жеті дүркін чемпионы 2013 жылы жарақат алғалы бері дәрігерлердің бақылауында. Оның денсаулығына қатысты кез келген мәлімет әйелінің өтініші бойынша құпия күйінде сақталып отыр.
Естеріңізде болса, Шумахер Францияның Альпі тауларында шаңғымен сырғанап жүріп, тасқа баспен соғылған. Ол тікұшақпен бірден ауруханаға жеткізілген.
Михаэль 2000 жылдары «Формула-1-де» жасындай жарқырады. Бұған дейін ол 1994 және 1995 жылдары «Беннеттон» сапында чемпион атанған. Сонан соң неміс спортшысы Ferrari-ге ауысты. Сөйтіп ол қатарынан бес рет чемпионатта үздік шықты.
