Мерей Базарбаев финалда түрік балуанын 8:0 есебімен жеңіп, әлем чемпионы болды

Алмас Ахметов

Автор

Бүгін, 09:45

Мерей Базарбаев U23 әлем чемпионатында алтын медаль жеңіп алды

Күрес федерациясы

Қазақстандық еркін күрес шебері Мерей Базарбаев АҚШ-тың Лас-Вегас қаласында өткен 23 жасқа дейінгі балуандар арасындағы әлем чемпионатында алтын медаль жеңіп алды. Ол 57 келіге дейінгі салмақ дәрежесінің финалында түркиялық Бекир Кесерді 8:0 есебімен жеңді.

Шешуші белдесуде айқын басымдық танытқан қазақстандық спортшы осылайша еркін күрестен ұлттық құрамаға жалғыз алтын жүлдені сыйлады.

Мерей Базарбаевтың әлем чемпионатындағы жолы 1/8 финалдан басталды. Бұл кезеңде ол АҚШ өкілі, U23, U20 және U17 жас санаттарындағы әлем чемпионы Люк Лилледальды 3:1 есебімен ұтты. Ширек финалда француз балуаны Расул Галбораевтан 13:2 есебімен басым түссе, жартылай финалда жапониялық Даито Кацумені 7:0 есебімен жеңді.

Айта кетейік, Мерей Базарбаев — Қазақстан тарихында U23 санатында еркін күрестен әлем чемпионы атанған екінші балуан. Бұған дейін 2024 жылы Ризабек Айтмұхан 97 келіге дейінгі салмақта алтын медаль иеленген еді.

Қазақстан құрамасы Лас-Вегастағы әлем чемпионатын жалпы жеті медальмен аяқтады. Ұлттық құрама қоржынында үш алтын, бір күміс және үш қола жүлде бар.

Қазақстандық балуандардың нәтижелері:

Алтын: Айбек Айтбеков (60 келіге дейін, грек-рим күресі), Юсуф Ашрапов (72 келіге дейін, грек-рим күресі), Мерей Базарбаев (57 келіге дейін, еркін күрес).
Күміс: Темірлан Тұрдақын (87 келіге дейін, грек-рим күресі).
Қола: Шұғыла Өмірбек (55 келіге дейін, әйелдер күресі), Арсен Жұма (55 келіге дейін, грек-рим күресі), Джохар Узаров (130 келі, грек-рим күресі).