Оның қарсыласы кәсіпқой рингте 19 рет жеңілген мексикалық боксшы болмақ
Өзбекстандық этникалық қазақ – бокстан әлем чемпионы Руслан Абдуллаев кәсіпқой бокстағы алғашқы жекпе-жегін АҚШ-та өткізетін болды.
Қандасымыздың дебюті 6 наурызда Калифорнияда өтетін кәсіпқой бокс кешінде жасалады деп күтілуде. Оның қарсыласы мексикалық Валенсуэла Альвара болмақ. 36 жастағы боксшы кәсіпқой рингте 23 жекпе-жек өткізіп оның 19-да жеңілген екен және тек үшеуінде ғана жеңіске жеткен. Бір жекпе-жегі тең аяқталыпты.
Руслан Абдуллаев болса әуесқой бокстан 2023 жылғы әлем чемпионы. Сондай-ақ, 2022 жылы Азия чемпионатында алтын медаль жеңіп алған. Биыл қаңтар айында Өзбекстан чемпионатында жеңіске жеткен. Ол кәсіпқой боксқа ауысатынын былтыр Париж Олимпиадасындағы сәтсіздігінен кейін мәлімдеген болатын.
